Կառավարությունը նախատեսում է ապրիլի 1-ից բարձրացնել թոշակները 10 000 դրամով
Հայաստանի կառավարությունը նախատեսում է ապրիլի 1-ից բարձրացնել մոտ 600 000 թոշակառուների համար նշանակվող թոշակների չափը։ Ըստ նախագծված որոշման՝ թոշակները կբարձրանան ուղիղ 10 000 դրամով։
Այս որոշումը պետբյուջեի վրա կառաջացնի տարեկան 78.7 մլրդ դրամի կամ ավելի քան 208 մլն դոլարի հավելյալ ծախս։ Կառավարության անդամները պլանավորում են այս ծախսը ֆինանսավորել 2025 թվականի տնտեսական աճի հաշվին։
Այնուամենայնիվ, Ֆինանսների նախարարությունը որոշման նախագծի ամփոփաթերթում այն ռիսկային է համարում։ Նախարարությունը նշում է, որ «նախագծով հստակ գնահատված չեն ֆինանսական կարիքի ֆինանսավորման աղբյուրները»։ Որպես այլընտրանք՝ առաջարկվում է ոլորտի այլ ծրագրերի օպտիմալացման միջոցով կուտակված միջոցները ուղղել հավելյալ ծախսերի ֆինանսավորմանը։
Առաջին անգամ թոշակների բարձրացման մասին փետրվարի 25-ին հայտարարել էր վարչապետ Նիկոլ Փաշինյանը։ Նա նշել էր, որ 2025 թվականին Հայաստանում տնտեսական աճը գերազանցում է կանխատեսված ցուցանիշները, ինչը ստեղծում է լրացուցիչ հնարավորություն։
«Կարծում եմ՝ հենց իրենք՝ թոշակառուները, այս որոշման մեջ ունեն որոշակի դերակատարում, քանի որ հետվճարի համակարգից հետո հատկապես նրանք ավելի ու ավելի շատ են անկանխիկ առևտուր անում՝ այդպիսով նպաստելով, որ ստվերային շրջանառությունը ՀՀ-ում կրճատվի»,- ասել էր վարչապետը։
Աշխատանքի և սոցիալական հարցերի նախարար Արսեն Թորոսյանը նույնպես հավաստիացրել էր, որ բյուջեում կա տնտեսական աճի նոր ցուցանիշ, որը թույլ է տալիս ավելի համարձակ ֆիսկալ քաղաքականություն վարել։
Էկոնոմիկայի նախարար Գևորգ Պապոյանը պնդել էր, որ «բյուջեում այդ փողերը կան»՝ նշելով, որ այդ գումարը չի գնում «մի քանի օլիգարխների և մի քանի պաշտոնյաների գրպանը», այլ մոտ 660 000 ՀՀ քաղաքացու գրպանը։
Փոփոխությունը նախատեսվում է ուժի մեջ մտցնել 2026 թվականի մարտի 23-ին։
