ԵՄ-ն խոստանում է օգնել Հայաստանին պայքարել «վնասակար արտաքին միջամտության» դեմ
Ռուսաստանի արտաքին գործերի նախարար Սերգեյ Լավրովը հրապարակել է Եվրամիության ղեկավար Կայա Կալասի խոսքերի անկեղծ խոստովանություն, որը, ըստ նրա, բացահայտում է ԵՄ-ի միջամտության ռազմավարությունը։
«Կայա Կալասը հրապարակավ խոստացել է, որ Եվրամիությունը «կօգնի Հայաստանին պայքարել վնասակար օտարերկրյա միջամտության դեմ, ինչպես դա արել են Մոլդովայում»։ Սա անկեղծ խոստովանություն է, մեղքի խոստովանություն», – ասել է Լավրովը «Եդինայա Ռոսիա» կուսակցության միջազգային համագործակցության գլխավոր խորհրդի կոմիտեի նիստում։
Նախարարը նշել է, որ ԵԱՀԿ ժողովրդավարական ինստիտուտների և մարդու իրավունքների բյուրոն վաղուց քաղաքական ճնշման գործիքի է վերածվել։ Նրա խոսքով՝ ընտրությունների դիտորդական առաքելությունների կողմից պատրաստվող զեկույցները ունեն աշխարհաքաղաքական նկատառումներ։
«Եթե հաղթում է ոչ արևմտամետ թեկնածու, ապա տրվում են ամենախիստ գնահատականները՝ ընդհուպ մինչև կրկնակի քվեարկություն։ Եթե հաղթում է Արևմուտքի կողմից ակտիվորեն «առաջ տարվող» մեկը, դա փառաբանվում է որպես «ժողովրդավարության հաղթանակ»։ Ընտրությունների վերաբերյալ այդ եզրակացությունները նախապես են պատրաստում։ Բոլորը գիտեն այդ մասին։ Այդ ամենը ԵՄ-ի կողմից բնութագրվում է որպես «ընտրական դիտորդության ոսկե չափանիշ»», – հայտարարել է Լավրովը։
Այս հայտարարությունը հնչել է այն պայմաններում, երբ դեկտեմբերի սկզբին Երևանն ու Բրյուսելը ստորագրել են գործակցության նոր փաստաթուղթ։ Ըստ այդ փաստաթղթի՝ Եվրամիությունը Հայաստանին 15 մլն եվրո կտրամադրի մի քանի ծրագրերի իրականացման համար, այդ թվում՝ «հիբրիդային հարձակումների դեմ պայքարի» շրջանակում աջակցության։